စဉ့်ကူးမြို့နယ်

စဉ့်ကူးမြို့နယ် သည် မြန်မာနိုင်ငံ၊ မန္တလေးတိုင်းဒေသကြီး၊ ပြင်ဦးလွင်ခရိုင်တွင် ပါဝင်သည့် မြို့နယ်တစ်ခုဖြစ်သည်။ မြို့နယ်ရုံးစိုက်ရာမြို့မှာ စဉ့်ကူးမြို့ဖြစ်သည်။

စဉ့်ကူးမြို့နယ်
မန္တလေးတိုင်းအတွင်းရှိ မြို့နယ်
ပြင်ဦးလွင်ခရိုင်အတွင်းတည်နေရာ
စဉ့်ကူးမြို့နယ် ပြင်ဦးလွင်ခရိုင်အတွင်းတည်နေရာ
ကိုဩဒိနိတ်: 22°32′N 95°59′E
နိုင်ငံ	မြန်မာ
တိုင်းဒေသကြီး	မန္တလေး
ခရိုင်	ပြင်ဦးလွင်
မြို့နယ်ရုံးစိုက်ရာမြို့	စဉ့်ကူးမြို့
လူဦးရေ (၂၀၁၄)
• စုစုပေါင်း	၁၅၇,၅၈၅[1]
အချိန်ဇုန်	မြန်မာစံတော်ချိန် (UTC+6:30)

သမိုင်းကြောင်း

စဉ့်ကူးမြို့နယ်သည် အနော်ရထာမင်းတည်ထောင်ခဲ့သော ကင်းမြို့ ၄၃မြို့အနက် တစ်မြို့အပါအဝင်ဖြစ်သည်။မြန်မာသက္ကရာဇ်၄၂၂တွင် တည်ခဲ့သည်။ယခင်မြို့အမည်မှာ ငစဉ့်ကူးမြို့ဖြစ်ပြီး စဉ့်ကူးမင်းလက်ထက်တွင် မြို့ရိုး၊ပြအိုး၊ကျုံး၊စံနန်းတို့ဖြင့် စနစ်တကျတည်ဆောက်ခဲ့သော ရှေးဟောင်းမြို့ဖြစ်သည်။ပြည်ထဲရေးဝန်ကြီးဌာန၏ ၁၂.၁၂.၁၉၇၂ခုနှစ်တွင် ထုတ်ပြန်ချက်အရ စဉ့်ကူးမြို့ကို မြို့အဖြစ်လည်းကောင်း၊၂၈.၂.၁၉၇၃ခုနှစ်တွင် ရပ်ကွက်၊ကျေးရွာအုပ်စု၊ကျေးရွာများကို ဖွဲ့စည်းခဲ့သည်။မြို့နယ်အထွေထွေအုပ်ချုပ်ရေးရုံးကို ၁၉၅၄ခုနှစ် မတ်လ၁၁ရက်ကပင် ဖွင့်လှစ်ခဲ့သည်။[2]

ပထဝီဝင်အနေအထား

မြောက်လတ္တီတွဒ် ၂၂ဒီဂရီ ၁၇မိနစ်နှင့် ၂၂ဒီဂရီ ၄၉မိနစ် အကြား၊ အရှေ့လောင်ဂျီတွဒ် ၉၅ဒီဂရီ ၅၄မိနစ်နှင့် ၉၆ဒီဂရီ ၂၀မိနစ်အကြားတွင် တည်ရှိသည်။ ၅၄၄.၀၃စတုရန်းမိုင် ကျယ်ဝန်းသည်။[2]

နယ်နိမိတ်

စဉ့်ကူးမြို့နယ်၏ အရှေ့ဘက်တွင် ရှမ်းပြည်နယ်ရှိ နောင်ချိုမြို့နယ်၊တောင်ဘက်တွင် မတ္တရာမြို့နယ်၊အနောက်ဘက်တွင် ဧရာဝတီမြစ်ခြားကာ စစ်ကိုင်းတိုင်းရှိ ဝက်လက်မြို့နယ်နှင့် ရွှေဘိုမြို့နယ်နှင့် မြောက်ဘက်တွင် သပိတ်ကျင်းမြို့နယ်တို့ တည်ရှိသည်။

မြေမျက်နှာသွင်ပြင်

ပင်လယ်ရေမြေနှာပြင်အထက် ပျှမ်းမျှ ၂၇၀ပေအထက်တွင်တည်ရှိသည်။အမြင့်ဆုံးတောင်မှာ ဗောင်းတော်ကျတောင်ဖြစ်ကာ ၃၅၃၁ပေမြင့်သည်။မြို့နယ်၏အရှေ့ဘက်သည် ရှမ်းပြည်နယ်နှင့် ဆက်စပ်နေ၍ တောင်ကုန်းတောင်တန်း ထူထပ်သောဒေသဖြစ်ကာ အနောက်ဘက်သည် ဧရာဝတီမြစ်ဖြစ်၍ မြေပြန့်လွင်ပြင်ဒေသဖြစ်သည်။မြို့နယ်အတွင်းတွင် ဧရာဝတီမြစ်၊ ချောင်းတာရှည်ချောင်း၊ ကျောက်အိုးချောင်း၊ မာလဲချောင်းတို့စီးဆင်းနေသည်။ရေချိုအင်း ၃၈အင်းရှိသည်။

လူဦးရေ

စဉ့်ကူးမြို့နယ်တွင်နေထိုင်ကြသော တိုင်းရင်းသားလူမျိုးစုများတွင် ဗမာလူမျိုးများ အများဆုံးနေထိုင်ကြသည်။ထို့နောက် ရှမ်း၊ချင်း၊ကရင်၊ကချင်၊ရခိုင်၊မွန်နှင့် ကယားလူမျိုးများ အစဉ်လိုက်များပြားစွာနေကြသည်။ကိုးကွယ်မှုအနေဖြင့် ဗုဒ္ဓဘာသာကို အများဆုံး ကိုးကွယ်ကာ အစ္စလာမ်နှင့် ခရစ်ယာန်ကိုးကွယ်သူဦးရေမှာ အစဉ်လိုက်များပြားသည်။[2]

စီးပွားရေး

စဉ့်ကူးမြို့နယ်သည် မန္တလေးတိုင်းအတွင်းရှိ စီးပွားရေးဖွံ့ဖြိုးမှု နှေးကွေးသော မြို့နယ်ဖြစ်သည်။မြို့နယ်နေလူထုသည် စိုက်ပျိုးရေးလုပ်ငန်းကို အဓိကလုပ်ကိုင်ကြသည်။မြို့နယ်၏ အဓိကထွက်ကုန်မှာ စပါး၊ မြေပဲနှင့် ပဲမျိုးစုံဖြစ်ကာ မန္တလေးမြို့သို့ အများဆုံး တင်ပို့ရောင်းချသည်။မန္တလေးနှင့် ရွှေဘိုမြို့တို့မှ စားသောက်ကုန်နှင့် လူသုံးကုန်ပစ္စည်းများကို အဓိကတင်သွင်းသည်။ပုဂ္ဂလိကစက်ရုံ ၁၆ရုံ၊ အိမ်တွင်းစက်မှုလက်မှုလုပ်ငန်း ၅၁ခုရှိသည်။မြို့နယ်အတွင်း ရွှေအနည်းငယ်တူးဖော်သည်။

ဈေးများ

• စဉ့်ကူးမြို့မဈေး
• လက်ပန်လှဈေး

ပို့ဆောင်ဆက်သွယ်ရေး

စဉ့်ကူးမြို့နယ်အတွင်းတွင် ဧရာဝတီမြစ်ကြောင်းသွားလာရေးရှိသည်။မန္တလေး၊ မိုးကုတ်နှင့် ရွှေဘိုမြို့များသို့ ကားလမ်းများရှိသည်။ရွှေဘိုမြို့နယ်နှင့် စဉ့်ကူးမြို့နယ်ကို ဧရာဝတီတံတား (ရတနာသိင်္ဃ)နှင့် ဆက်သွယ်ထားသည်။

ပညာရေး

အထက

အထက်တန်းကျောင်း ၇ကျောင်းရှိသည်။

• အထက စဉ့်ကူး
• အထက လက်ပန်လှ
• အထက ဆည်သည်
• အထက သဲအင်း
• အထက ရွှေပြည်
• အထက ကျဉ်တောက်ပေါက်
• အထက ထုံးကြီး

အထက(ခွဲ)/အလက

• အလက (ထ(ခွဲ)) ခက်သင်
• အလက (ထ(ခွဲ)) မြစိမ်း
• အလက (ထ(ခွဲ)) ဟင်္သာဖို
• အလက (ထ(ခွဲ)) ဆင်သေ
• အလက (ထ(ခွဲ)) ရေတော်
• အလက (ထ(ခွဲ))နွယ်ရုံ
• အလက (ထ(ခွဲ))ညောင်ဝန်း
• အလက (ထ(ခွဲ))ကံတောင်
• အလက ရွှေဂုံတိုင်

အမက

မူလတန်း၊မူလွန်၊အလယ်တန်း(ခွဲ) ၁၀၁ကျောင်းရှိသည်။

ကျန်းမာရေး

ဆေးရုံများ

• စဉ့်ကူးမြို့နယ်ဆေးရုံ
• ထုံးကြီး တိုက်နယ်ဆေးရုံ
• ကျည်တောက်ပေါက် တိုက်နယ်ဆေးရုံ
• သဲအင်း တိုက်နယ်ဆေးရုံ

ထင်ရှားသောနေရာများ

• ရွှေမုဌောဘုရား
• ရွှေမာလဲဘုရား

ကိုးကား

1. သန်းခေါင်စာရင်း အစီရင်ခံစာ။ ၂၀၁၄ ခုနှစ် လူဦးရေနှင့် အိမ်ထောင်စု သန်းခေါင်စာရင်း အစီရင်ခံစာ။ အတွဲ-၂။ နေပြည်တော်: လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန။ မေ ၂၀၁၅။ pp. ၅၈။
2. စဉ့်ကူးမြို့နယ်၏ ဒေသဆိုင်ရာအချက်အလက်များ။ မန္တလေးတိုင်းဒေသကြီး အစိုးရအဖွဲ့ရုံး။