ရိုးသားဖြောင့်မတ်ခြင်း
စည်းကမ်းကောင်း၍ ရိုးသားဖြောင့်မတ်ခြင်းသည် လူတို့တွင် မရှိမဖြစ်လိုအပ်သော ဂုဏ်တစ်ရပ် ဖြစ်သည်။ အဇ္ဇဝ ajjava (ရိုးသားဖြောင့်မတ်ခြင်း Honesty) ဆိုသည်မှာ နုံအခြင်းမဟုတ်ချေ။ ပညာမဲ့ခြင်းမဟုတ်ချေ။ ရိုးသားခြင်းသည် အကောင်းဆုံးဝါဒဖြစ်သည် Honesty is the best policy ဆိုသော စကားရပ်လည်း ရှိပါသည်။ ရိုးသားဖြောင့်မတ်စွာကျင့်ကြံရာ၏။ လူသားတိုင်း ရိုးသားဖြောင့်မတ်ရန် အရေးကြီး၏။ ရိုးသားဖြောင့်မတ်ခြင်းသည် ဗုဒ္ဓဘာသာတွင် လွန်စွာအရေးကြီးသော အရည်အချင်းတစ်ရပ်လည်းဖြစ်သည်။ ရိုးသားဖြောင့်မတ်ခြင်း Honesty and integrity သည် ကမ္ဘာ့ မင်္ဂလာတရား ဖြစ်သည်။ လူရှေ့သူရှေ့မှာသာ ရိုးသားမှုကိုပြရန်မဟုတ်၊ လူကွယ်ရာအရပ်၊ ဆိတ်ကွယ်ရာအရပ်၌ပင် ရိုးသားမှု ရှိရာ၏။
ရိုးသားခြင်းသည် ဗုဒ္ဓဘာသာ မိသားစုတွင် ထင်ရှားသောအမှတ်အသားတစ်ခု ဖြစ်သည်။ ထို့ကြောင့် လင်နှင့်မယားသည် အချင်းချင်း ရိုးသားပွင့်လင်းစွာ စကားပြောဆိုကြရမည်။ အိမ်ထောင်ဖက်မဟုတ်သူနှင့် လူစိမ်းများဖြင့် ပရောပရီပြုခြင်း၊ အင်တာနက်မှတစ်ဆင့် လျှို့ဝှက်ဆက်သွယ်ခြင်း၊ ညစ်ညမ်းသောရုပ်ပုံများကြည့်ခြင်း အစရှိသော မသန့်ရှင်းသည့်အကျင့်များ ဗုဒ္ဓဘာသာ အိမ်ထောင်တွင် လုံးဝမရှိသင့်ပါ။ အိမ်ထောင်သည်အချို့သည် ဤကဲ့သို့သော မှားယွင်းသည့်အကျင့်များကို အိမ်ထောင်ဖက် မသိအောင် လျှို့ဝှက်ပြုမူနေကြ၏။ ထိုသို့ပြုမူခြင်းသည် မရိုးသားပါ။ သင်သည် အိမ်ထောင်သည်ဖြစ်လျှင် သင့်အိမ်ထောင်ဖက်မသိအောင် လျှို့ဝှက်ပြုမူစေသောအပြုအမူများကို ဘယ်တော့မျှမပြုပါနှင့်။ အကယ်၍ တစ်စုံတစ်ယောက်သောသူတစ်ဦးသည် မည်မျှပင်အရည်အချင်းကောင်းများ ပြည့်စုံစေကာမူ ရိုးသားမှုမရှိလျှင် မကြာခင်ကျဆုံးမည်သာဖြစ်သည်။ [1] ရှေးမြန်မာဘုရင်များလက်ထက်ကပင် မင်းကျင့်တရားဆယ်ပါး (Ten Codes of conduct for Kings and Government) ၌ အဇ္ဇဝ (ရိုးသားဖြောင့်မတ်ခြင်း) သည် မရှိမဖြစ် လွန်စွာအရေးကြီးသော အရည်အချင်းတစ်ရပ်အဖြစ် ခေတ်အဆက်ဆက်တွင် ပါဝင်ပြဋ္ဌာန်းခဲ့ပြီးဖြစ်သည်။[2]