ဂရိတ်တား​အာရှဆု

ဂရိတ်တား အာရှဆု

ဂျပန်ခေတ် (၁၉၄၂ ၊ မတ်လ ၈ ရက်မှ ၁၉၄၅ ၊ မေလ ၃ရက်ထိ) ဂျပန်အစိုးရ ဝါဒဖြန့်ဖြူးရေးဌာနက ဂရိတ်တားအာရှသတင်းစာကို ၁၉၄၃ ခု၊ ဖေဖော်ဝါရီလတွင် စတင်ထုတ်ဝေသည်။ စင်စစ် ယင်းသတင်းစာသည် ဂျပန်နိုင်ငံ မိုင်နိချီ သတင်းစာတိုက်၏ တိုက်ခွဲဖြစ်၍ အင်္ဂလိပ်ဘာသာဖြင့် ထုတ်ဝေသော သတင်းစာဖြစ်သည်။ ထိုဂရိတ်တား အာရှသတင်းစာတိုက်မှ ၁၉၄၃ ခု၊ ဩဂုတ် (၁) ရက်နေ့တွင် ဂျပန်တို့က မြန်မာနိုင်ငံအား လွတ်လပ်ရေးပေးသည့် အထိမ်းအမှတ် စာပေဆုအဖြစ် ဆောင်းပါး၊ ဝတ္ထုနှင့် ကဗျာပြိုင်ပွဲများကျင်းပသည်။ ဦးတည်ရေးသားရန်ပေးထားသော အကြောင်းရပ်ကား မဟာအရှေ့အာရှ အကျိုးတူ ကြီးပွားရေးနယ်ပယ်အတွင်း မြန်မာနိုင်ငံ၏ အခန်းကဏ္ဍဟူ၍ ဖြစ်သည်။ မည်သူမဆို ဝင်ရောက် ယှဉ်ပြိုင်နိုင်သည်။ ချီးမြှင့်သည့်ဆုငွေကို ဆောင်းပါးနှင့် ဝတ္ထုပထမဆုအတွက် ငွေကျပ် (၁၀ဝ) ၊ ဒုတိယဆု နှစ်ဆုစီအတွက် ငွေကျပ်(၅၀) စီ၊ တတိယဆု သုံးဆုစီအတွက် ငွေကျပ် (၃၀) စီနှင့် ကဗျာပထမဆု ကျပ်ငွေ(၅၀) ၊ ဒုတိယဆုနှစ်ဆု ငွေကျပ်(၃၀) စီနှင့် တတိယဆု သုံးဆုစီအတွက် ငွေကျပ် (၁၀) စီဖြစ်သည်။ အင်္ဂလိပ်၊ မြန်မာ၊ နိပွန်(ဂျပန်) မည်သည့်ဘာသာဖြင့်မဆို ပြိုင်ပွဲဝင်ပေးလေသည်။


ယင်းစာပေပြိုင်ပွဲ့၌ စာရေးဆရာ ရွှေပိန်သောင်းရေးသားသော ဗိုလ်အေရှ ဝတ္ထုက ဝတ္ထုပထမဆုကို ရရှိခဲ့သည်။ ထို့နောက် ၁၉၄၄ ခု၊ ဇွန်လ (၂၀) ရက်နေ့ထုတ် ဂရိတ်တားအေရှစာပေဆုကို ဒုတိယအကြိမ်ဆုပေးရန် ကြေညာခဲ့ပြန်သည်။ ရေးသားမည့် အကြောင်းရင်းမှာ နိပွန်မြန်မာ ပူးပေါင်း ဆောင်ရွက်မှု တကယ့် အဖြစ်အပျက်ဝတ်ထု ဖြစ်၍ စာလုံးရေ (၁၀ဝ၀) ထက် မများရန် ဖြစ်သည်။ ၁၉၄၄ ခုနှစ်၊ ဩဂုတ်လ (၁) ရက်နေ့တွင် ဂျပန်ခေတ် မြန်မာနိုင်ငံလွတ်လပ်ရေးရသည့် နှစ်ပတ်လည်နေ့ အထိမ်းအမှတ်အဖြစ် သတင်းစာတွင် ထည့်သွင်းနိုင်ရန် ကျင်းပခြင်းဖြစ်သည်။ ပုသိမ်မြို့မှ ဦးချစ်ဖေ၊ ပြည်မြို့မှ မောင်ခင်မောင်၊ မြေဘုံမြို့မှ မောင်ကျော်ဇံ၊ နိပွန်တပ်သား ဆင်ရှီချီဂိုကူစူနိုကိ၊ ကရင်အမျိုးသမီး ဆရာမ မကျော့တို့က ဆုအသီးသီးရရှိကြသည်။ ယင်းတို့အနက် ဦးချစ်ဖေနှင့် မောင်ခင်မောင်တို့အား မြန်မာနိုင်ငံ နိပွန်တပ်မတော် စစ်သေနာပတိကြီး ကိုယ်တိုင်က ချီးမွမ်းစကားပြောဆို ရေးသားပေးခဲ့သည်။ [1]

ကျမ်းကိုးစာရင်း
  1. ဒဂုန်ရွှေမျှား၊ မြန်မာနိုင်ငံစာပေဆုများ စာ ၄၅၄ - ၄၅၇ ။
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.